ТОЖИКИСТОН ВА АФҒОНИСТОН УЛАМОЛАРИ ЮРТИМИЗГА ТАШРИФ БУЮРДИ

Ўзбекистонда бўлиб ўтадиган халқаро анжуманда иштирок этиш учун Афғонистон ва Тожикистондаги диний соҳа раҳбарлари, етук уламолар, мутахассис ва мутасадди вакиллар юртимизга келди, деб хабар беради Ўзбекистон мусулмонлари идораси  ва Дин ишлари бўйича қўмита матбуот хизматлари.

Бугун, 14 март куни Ўзбекистон муслмонлари идораси раиси, муфтий Усмонхон Алимов ҳазратлари, Дин ишлари бўйича қўмита раиси Абдуғофур Аҳмедов, вилоят бош имом-хатиби Зайниддин Эшонқулов, Диний идора иш бошқарувчиси Рустам Жамилов ва бошқа мутасаддилар Самарқандга ташриф буюрган Тожикистон Республикаси делегациясини “Жартепа” чегара масканида кутиб олдилар.

Шунингдек, Ўзбекистон мусулмонлари идораси раисининг биринчи ўринбосари Ҳомиджон қори Ишматбеков Самарқанд вилоятида бўлиб ўтадиган анжуманга Афғонистон Ҳаж ва Вақф ишлари вазири бошчилигидаги уламоларни Сурхондарё вилоятида кутиб олди.

Бугун меҳмонлар Самарқанд вилоятидаги муборак қадамжоларни зиёрат қиладилар.

Эслатиб ўтамиз, эртага 15 март куни бўлиб ўтадиган халқаро анжуманда Ўзбекистон, Афғонистон ва Тожикистондаги диний соҳа раҳбарлари, етук уламолар, мутахассис ва мутасадди вакиллар иштирок этади.

Сафар жараёнлари ва анжуман ҳақидаги маълумотларни сайтимизда кузатиб боринг.