Амман шаҳрида Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчилигидаги делегация Иордания Ҳошимийлар Подшоҳининг дин ва маданият масалалари бўйича Бош маслаҳатчиси Шаҳзода Ғозий бин Муҳаммад билан учрашув ўтказди.
Мулоқот чоғида давлатимиз Раҳбарининг таклифига биноан Иордания Подшоҳининг Ўзбекистонга амалга оширган тарихий ташрифи ва унинг доирасидаги самарали музокаралар юксак баҳоланди. Ушбу ташриф доирасида имзоланган муҳим ҳамкорлик ҳужжатлари икки томонлама муносабатларни янги босқичга кўтаришга хизмат қилаётгани таъкидланди.
Суҳбат давомида Ўзбекистон ва Иордания халқлари ўртасидаги дўстона алоқалар изчил ривожланиб бораётгани, умумий диний-маънавий меросни биргаликда ўрганишни янада кенгайтириш, икки давлатнинг диний идоралари, вақф ташкилотлари, исломшунослик марказлари ва илмий-тадқиқот муассасалари ўртасида ҳамкорликни мустаҳкамлаш масалалари кенг муҳокама қилинди.
Шаҳзода Ғозий бин Муҳаммад ўз нутқи давомида ўтган август ойида Ўзбекистонга амалга оширган ташрифи жуда илиқ таассурот қолдирганини қайд этди. Жумладан, Ўзбекистон Президентининг мамлакат тараққиёти йўлидаги саъй-ҳаракатлари юксак эътироф этилиб, уларни қўллаб-қувватлаш муҳим эканини таъкидлади. Шу билан бирга, Иордания томони Ўзбекистон томонидан илгари сурилган барча ҳамкорлик йўналишларини амалга оширишга тайёр эканини маълум қилди.
Шаҳзода ўтказилган музокараларнинг юқори самара бергани, илм-фан, таълим-тарбия, малака ошириш, жаҳолатга қарши маърифий йўл билан курашиш ва ўзаро тажриба алмашиш каби йўналишларда амалий ҳаракатларни кучайтириш муҳимлигини алоҳида таъкидлади.
Ўзбекистон мусулмонлари идораси
Матбуот хизмати